BUTUAN CITY – Padayong gisuta sa mga sakop sa Philippine Drug Enforcement Agency kon PDEA-Caraga ang nakitang karatola gikan sa gipa-ilalom sa high impact operation nga drug den sa Brgy. Poblacion 5 sa Siargao Island, General L una, Surigao del Norte ning mi-aging alas-8:15 sa gabii.
Sigon ni Dindo Abellanosa, tigpamaba sa PDEA-Caraga, nakasulat sa karatola ang presyo sa ginadiling druga nga mapalit, apil na ang ma-avail nga sex services og mga ilimnong makahubog.
Mahinumdumang nasikop sa maong raid ang tag-iya sa drug den nga si British national Liam Cox apil na ang subject sa search warrant nga si Kirby Clet usa ka registered nurse dinhi sa Pilipinas og Australia nga miyembro usab sa Delgado drug group og Raul Dycueco, kagawad sa Brgy. 4 lungsod sa Dapa sakop usab sa maong isla.
Karong adlawa gikatakdang ipasaka ang mga kasong atubangon sa mga gibansagang high value targets (HVTs) sa Philippine Drug Enforcement Agency kon PDEA Caraga human nagpositibo sa gihimong drug test.
Sigon ni Abellanosa maghatag og dakong epekto ang maong operasyon sa drug situation sa Siargao Island ilabina sa lungsod sa General Luna nga maoy surfing capital sa Pilipinas.
Gibana-banang mukabat sa 500-gramos nga pina-ugang dahon sa marijuana nga nagkantidad og 12,500-pesos ang nakumpiska sa kapulisan og apil sa mga kasong ilang atubangon ang paglapas sa Sections 6, 7, 11, 12 og 15 sa Republic Act 9165. (Beth Ruiz)
