BUTUAN CITY – Nagsumite na ang kapulisan ug request for autopsy sa nakaplagang patay’ng lawas sa usa ka ginang nga nag-otaw-otaw sa usa ka fish pond sa lungsod sa Magallanes, Agusan Del Norte.
Sumala pa ni PO3 Maurice Bundoc sa Magallanes Municipal Police Station, gi-agni nila ang kabanay sa biktimang si Arsenita Bitco, 44-anyos, biyuda nga taga Purok-1, Barangay Giyasan sakop sa maong lungsod, nga ipa-autopsiya ang lawas aron masuta ang tinood nga hinungdan sa kamatayon niini.
Sigon pa ni PO3 Bundoc, gi-asuy sa anak sa biktima nga si Edmundo, nga katapusang nakit-an ang biktima nga naka-inom sa ilimnong makahubog og niadtong adlaw’ng Domingo mga alas 3:30 sa hapon, nakaplagan nalang kini sa nag-renta sa fishpond nga si Rolly Pabatang nga naglutaw nga wala nay kinabuhi sa fishpond, og anaa na sa state of decomposition.
Gelayon matud pa siyang mitawag sa mga silingan og daling nailhan ang biktima.
Sa karun, gipahiluna na ang patay’ng lawas sa usa ka pribadong punerarya sa may Cabadbaran City, probinsiya sa Agusan Del Norte.
