BUTUAN CITY – Gisugdan na ang pag-develop sa sewerage and waste management system sa Siargao Island aron malikayan ang susamang problema sa Boracay island.
Gigahinan og 290-milyones pesos ang sentralisadong solid waste management system kansa gitinguhang makumpleto karongtuiga o kaha sunod tuig 2019.
Gawas niini, duna usa’y gigahin nga mga dump trucks ngadto sa mga barangay alang sa garbage collection nga ilabay sa waste-to-energy facility kansa tukoron sa usa ka Korean environmental company.
Mahinumdumang sa sayong bahin ning semanaha, nagmontar na ang lokal nga panggamhanan sa isla og Incident Command Post kon ICP kansa nahimutang sa Oh Wow Surf sa Cloud 9 sa lungsod sa General Luna.
Gipaneguro ni Surigao del Norte Gov. Sol Matugas nga ang mga meymbro sa ICP First Aid Team magpabilin sa area sulod sa bente kwatro oras aron makaresponde sa hinanaling panghitabo sa mga turista, bisita ug surfers sa isla.
Samtang naka standby usab ang rescue team sa matag surfing spot sa General Luna.
Gimandu na sa ehekutibo sa probinsya ang istrektong pagpatuman sa environmental laws, rules and regulations sa pagprotekta ug pagpreserve sa kaanyag sa isla nga una ng gibansagang “Paradise Island” sa amihanang sidlakan sa Mindanao. (Rolan Janea)
