BUTUAN CITY – Kasong reckless imprudence resulting to homicide ang kasong atubangon sa driver sa usa ka Ford Everest human kini nakabangga-patay og usa ka lalaki pasado alas-11:45 kagabii sa Cabadbaran City.
Naila ang biktimang si Roger Andunga, 48-anyos, ulitawo og residente sa Purok 3, Brgy. Mabini samtang ang suspek, mao si Julieto Naresca, 40-anyos residente sa Purok 1, Brgy. Cabantian lungsod sa Manticao, Misamis Oriental.
Sigon ni P/Chief Insp. Rennel Serrano, hubog matud pa ang biktima kinsa kalit lang midagan patabok sa kalsada hinungdan nga nasentro kini pagka-igo sa bumper sa nasangpit nga sakyanan.
Gidala pa ang biktima sa Cabadbaran Emergency Hospital apan gideklara kining dead on arrival sa attending physician. Usa matud pa ka bag-ong uli nga seaman ang driver sa Everest nga pa-uli na unta gikan misuroy sa Surigao area dihang nabagatan ang maong aksidente.
Anaa pa sa kostudiya sa police station ang suspek samtang padayon pang gihikay ang mga dokumentong gamiton sa pagpasaka og kaso. (Beth Ruiz)
