BUTUAN CITY – Dakong kawad-on sa surfing industry sa Siargao Island ang planong pagpasira sa surfing area sa Siargao Island diin na-aksidente ang anak sa journalist nga si Karen Davila.
Kini ang reaksiyun sa surfer nga si Roel Catoto gikan sa General Luna, Surigao Del Norte, usa ka certified US life guard og kanhi miyembro sa American Red Cross.
Sa eksklusibong pakighinabi sa Bombo Radyo Butuan, gipadayag ni Catoto nga dakong kawad-on ilabina sa mga lokal nga surfers ang planong pagpasira ni Governor Sol Matugas sa surfing spot alang sa mga beginners diin nahitabo ang insedente ilabina sa Isla Cabana Resort.
Lakip na niini ang planong ipasira sa Cloud 9 Tower nga layo ra sa dapit nga nahitaboan tungod kay karaan na kini nga gama pa sa kahoy.
Nasayrang ning mi-aging Semana Santa, mi-aksyon kini ug unlod tungod sa daghang tawo ang midagsa niini gawas pa kini sa daghang mawad-an sa ilang pangwarta dili lang sa maong lugar kundi sa kasikbit nga mga dapit ilabina kadtong mga miyembro sa Siargao Island Surfers Association, nga mipa-ilalom sa pagbansay sa mga life guards.
Iyang gidugang nga dugay na ang surfing sa maong lugar og daghan na ang mga surfer instructors nga tungod sa kwarta, daghang mga dili certified, ang magpaka-instructor.
Gikasubo usab ni Catoto ang nahitabo sa anak ni Karen Davila, apan isolated case lang matud pa kini dungan sa pagbutyag nga normal na kini sa mga nagbansay pa.
Ang gikadismaya lang niini mao ang kawalay ospital sa lugar, o kaha mga life guards nga dugay na matud pa niyang gisugyot sa mayor.
Kinahanglan matud pa nga andam ang lokal nga kagamhanan pag-responde sa mga aksidente ilabina kay ginabaligya ang isla sa tibook kalibutan isip tourist destination.
Dili matud pa masulbad ang maong problema pinaagi sa pagpasira sa ubang mga surfing areas kondili pinaagi lang sa pag-provide sa mga kulang niini. (Rolan Janea)
