BUTUAN CITY – Pabiling blangko ang kapuyo sa gipatay nga kanhe sundalo atol sa Domingo sa Pagkabanhaw sa motibo sa maong pagpamusil kaganinang alas 6:00 sa buntag sa may Purok-10, Barangay Bit-os ning siyudad sa Butuan.
Sa eksklusibong pakighinabi sa Bombo Radyo Butuan kang Rosemen Asis, gi-asuy niini ang nahitabong pagpamusil ngadto sa iyang kapuyo nga si Leo Jhan Asis, 57-anyos, usa ka retiradong army og sinaligan ni Jovic Lagnada, ang igsoon ni Butuan City Mayor Ronnie Vicente Lagnada.
Sumala pa niini, sakay sa multicab ang iyang biktima nga miadtu sa ilang umahan, mga 500 metros ang kalay-on gikan sa ilang pinuy-anan, aron unta magsugba-sugba isip pahalipay sa iyang mga trabahante, sa dihang gipusil sa gibana-banang 10 ka armadong lalaki, nga naka-bonnet ug nagpurong.
Samtang siya kauban sa iyang walo ka bulan nga anak nga anaa lang sa panimalay, ang gisaka usab sa duha ka armado, ug gitiunan.
Misibat ang mga niini human nakabitbit ang armas.
Pagbutyag pa sa kapuyo, nakadungog nalang siya ug mga 10 ka buto sa wala mailhing klase sa armas, nga mao na diay kadto ang higayong pagpusil sa biktima nga naka-angkon ug 5 ka samad pinusilan sa nagkadaiyang parte sa lawas hinungdan sa kamatayon.
Pahayag pa niini nga armas lang matud pa ang tuyo sa mga suspetsado, apan nawala usab ang salaping cash nga gibana-banang muabot sa 30-mil pesos diha sa pitaka sa biktima.
Nasayrang usa ka tuig palang ang panag-ipon nila og gipatikad kini sa duha ka hektarya nga yuta ni Jovic Lagnada nga ig-agaw ra usab sa biktima.
Sa karun, padayon pa ang imbestigasyon sa kapulisan samtang gidala na sa pribadong punerarya ang patay’ng lawas sa biktima.
