BUTUAN CITY – Dismayado ang militar tungod sa paglapas mismo sa mga rebeldeng New People’s Army kon NPA sa ilang gideklarang temporaryong ceasefire alang sa Semana Santa.
Kini human gikumpirma ni Lt. Col. Glenn Aynera – commander sa 29th Infantry ‘Matatag’ Battalion, Philippine Army nga usa ka rebelde ang patay sa engkwentro tali sa duha ka grupo kagahapon sa alas-2:50 sa hapon didto sa Sitio Kaunlaran, Brgy. Tagbungabong, lungsod sa Remedios T. Romualdez kon RTR, Agusan del Norte.
Sa pakighinabi ning sibyahan, gibutyag sa opisyal nga ang mga sakop sa Squad Committee 21-C nga nag-operate sa RTR-Butuan ang na-engkwentro sa iyang mga sakop sa Scout Platoon ubos kang 2Lt. Colagong sulod sa 10-minutos.
Daling nanibat ang mga rebelde binilin ang namatay nilang ka-ubanan kinsa nagbitbit pa og usa ka AK47 rifle og gi-turn over na ngadto sa mga barangay officials.
Gidugang sa opisyal nga daan na silang nagduda sa gideklarang ceasefire sa mga rebelde tungod kay sukad matud pa kaniadto, na-andan na sa grupo ang dili gihapon pagsunod niini.
Pantalya lang matud pa sa maong grupo ang deklarasyon tungod kay sila mismo ang mutuis niini pinaagi sa padayong pagpang-harass sa pwersa sa kagamhanan. (Beth Ruiz)
