BUTUAN CITY – Gimanduan karon sa Commission on Elections kon COMELEC En Banc nga nakabase sa Intramuros, Manila ang COMELEC-Cabadbaran City sa pag-andam na sa calendar of activities alang sa ilusad nga recall elections sa maong siyudad.
Kini human gi-deny sa komisyon ang verified appeal ni Mayor Katrina Marie Mortola batuk sa gihimong validation sa COMELEC-Cabadbaran ngadto sa mga signatories sa petisyong nagtinguha sa maong recall.
Sa desisyong gipagawas ni COMELEC acting chairman Al Parreño, gi-certify niini ang mga kongklusyon nga nakab-ot sa gipahigayong konsultasyon sa mga membro sa komisyon nga gilangkuban nila commissioners Lute Tito Guia, Ma. Rowena Amelia Guanzon og Sheriff Abas.
Mahinumdumang giproklamar nga mayor sa Cabadbaran City si Mortola niadtong Mayo 16, 2016 hinungdan nga nagduso og petition for recall ang kampo sa ka-atbang niini sa pagpanguna ni Agusan del Norte Gov. Angel Amante-Matba.
Gipaboran ang petisyon human naka-verify og 8,947 ka mga supporting petitioners ang COMELEC-Cabadbaran City gikan sa 44-mil, 737 ka voting population.
Ang maong ihap naka-abot sa required minimum percentage og ihap sa mga supporting petitioners alang sa pagpahigayon sa recall election.
Alayon niini, gipasabot ni Atty. Homer Mabale nga duna’y 30 ka adlaw ang COMELEC-Cabadbaran City aron pagpahigayon sa recall election. (Beth Ruiz)
