BUTUAN CITY – Dili pa gihapon madawat sa pamilya Paradina nga musangpot sa trahedya ang ila untang family bonding human nalumos sa swimming pool ang 5-anyos nga bata sa Fiesta Resort sa Brgy. Ipil sa Surigao City.
Naila ang biktimang si Melvin Mark Paradina, residente sa Therese St. sakop sa maong siyudad kinsa ka-uban sa iyang mga ginikanan pagdalikyat sa maong resort.
Sigon ni P/Supt. Diomedes Cuadra Jr., hepe sa Surigao City Police Station, diha gipahimutang sa iyang inahan ang biktima sa kiddie pool kinsa magsige og adto sa ilang cottage aron mangayo og pagkaon.
Posibleng nalipat matud pa ang inahan tungod usab sa gi-atiman niining manghod sa biktima hinungdan nga pagka-alas tres sa hapon, nakit-an na lang nga naglutaw sa adult pool ang biktima.
Gi-CPR matud pa kini og gidala sa ospital apan gideklara nang dead on arrival sa attending physician. (Beth Ruiz)
