BUTUAN CITY – Gikasabutan sa 19 ka mga miyembro sa Consultative Committee nga maoy gitahasan nga magtuon alang sa pag-usab sa batakang balaod sa nasud, ang mga dugang qualifications alang niadtong buot mukandidato sa pagka-senador ug kongresista sa nasud.
Sigon ni kanhi Senador Aquilino ‘Nene’ Pimentel Jr. sa pakighinabi ning sibyahan, ilang na-uyunan sa ilang tigom nga kinahanglang ang mga mukandidato pagka-senador ug kongresista, adunay literary requirements sa ilang qualifications ug kinahanglan usab nga college degree holder kini.
Sigon niini, kinahanglang dili lang able to read ang qualifications aron masabtan gyud ang iyang trabaho.
Human niini, musunod gilayon ang mukandidato pagka-presidente ug ang ubang mga posisyon nga mapahamtangan usab sa susamang mga qualifications.
Sunod nilang hisgutan ang political dynasty kondiin paninguhaon nila nga makab-ot ang oras aron ma-presentar dayon nila ang resulta sa ilang pagtuon kang Pangulong Rodrigo Duterte.
Nasayran nga gihatagan lamang sila ug 6 ka buwan aron makahimo ug rekomendasyon ngadto sa Pangulo mahitungod sa giplanuhang pag-usab sa konstitusyon.
Gipanghinaot na lamang usab niini nga unta madugangan ug dugang representasyon ang consultative committee hilabi na gikan sa mga kababayen-an ug sa sector sa mga Muslim. (Mon Aplaya)
