BUTUAN CITY – Gikumpirma sa tigpamaba sa buhatan sa Department of Transportation and Railways ( DOTR ) – Caraga nga aduna siya’y mga hulga sa kinabuhi nga nadawat karon tungod sa iyang pagka-aktibo sa pagpakgang sa mga ilegal nga binuhatan nga padayong nagtunhay sa nasangpit nga buhatan.
Sa eksklusibong pakighinabi ning sibyahan, gibutyag ni Tina Cassion, information officer sa Department of Transportation and Railways ( DOTR ) – Caraga, nga kasagari matud pa ipaagi sa text, tawag ug ang uban ipaagi pa sa iyang mga kaila ang pagpaabot sa mga hulga.
Sigon niini, nga dili lalim alang kaniya ang maong sitwasyon tungod kay wala man siya’y gihimong daotan gani nadismaya pa kini tungod kay bisan paman sa iyang mga pagpaningkamot, kini pa ang iyang nadawat nga bugti.
Hinuon, naanad na matud pa siya niini tungod kay mao naman kini ang iyang mga kasinatian kaniadto sa dihang usa pa kini ka aktibista ug magsisibya.
Una niini, maisugong giyagyag sa maong opisyal dinhi sa sibyahan ang matud pa nagpadayon pa gihapon nga ilegal nga mga binuhatan sa pipila ka mga kaubanan niini sa DOTR – Caraga.
Sigon niini, nga anaa gihapon matud pa’y mga empleyado sa ilang ahensya nga wala gihapon misunod sa mga kabag-uhan nga buot ipatuman ni Pangulong Rodrigo Duterte ngadto sa mga opisina sa gobyerno hilabi na sa DoTR.
Matud pa nga daw nahimo nang lifestyle sa mga niini sulod sa 22 na ka tuig ang fixing, overcharging sa mga bayad, ug uban pang ilegal nga binuhatan hilabi na sa Land Transportation Office ( LTO ) ug sa Land Transportation Franchising and Regulatory Board ( LTFRB ).
Usa sa mga deriktang gitumbok niini mao ang Bayugan Outreach Program nga alang kaniya, dugay na matud pa nilang gipasirad-an apan gikadismaya niini sa dihang nasayran nga padayon pa gihapong nag-abli ang maong opisina.
Gitin-aw niini nga sa karon, wala’y pagtugot gikan kanila nga mag-abli ang LTO – Bayugan tungod sa mga nadawat nila nga mga reklamo mahitungod sa mga ilegal nga binuhatan sa mga personahe sa maong buhatan.
Giklaro usab niini nga kung mukuha man ug lisensya, 818 pesos lang ang bayaran kung new license samtang 600 pesos kapin lang kung renewal sukwahi sa ginatanyag sa mga fixer nga 2, 800 – pesos ug ang uban mangayo pa ug 3, 000 – pesos kapin.
Lain pa nga gikadismaya sa maong opisyal ang matud pa gihan-ay nga signature campaign petition batuk kaniya aron nga mapapahawa na siya sa maong opisina. Direktang gitudlo niini nga maoy nagpaluyo sa maong lakang mao sila Nelida Cataluna nga nag-atubang na karon ug kaso sa Anti-Red Tape Act , Narissa Batobalonos ug uban pa nga dugay na matud pa niyang nakabikil subay sa pipila ka mga palisiya nga gipatuman sa ilang buhatan.
Subay niini, giangkon usab sa maong opisyal nga aduna gihapon mga insider nga fixer sa sulod sa ilang buhatan nga maoy tig-proseso sa mga transaksyon nga itunol gikan usab sa ilang mga kaubanan sa gawas.
Kini ang rason kung ngano gitahasan siya sa ilang kasamtangang regional director nga muhimo ug imbestigasyon subay niini nga padayong nagtunhay sa ilang ahensya. Giawhag usab niini ang publiko hilabi na kadtong mga nangabiktima nga mupatim-aw ug ibutyag usab ang ilang mga dili maayong kasinatian sa nasangpit nga opisina.
