BUTUAN CITY – Giklaro ni Senador Bam Aquino nga duna na sila’y inisyal nga mga solusyong gihimo ang Senate Committee on Science and Technology batuk sa gireklamong pagpangawat og load kon ‘Nakaw Load’ nga gihimo sa mga higanteng telecommunication companies kon telcos sa nasud.
Sa eksklusibong pakighinabi ning sibyahan, gipadayag sa senador nga migawas sa ilang unang pagdungog nga usa sa mga telcos ang mi-angkong duna’y ilang vale added service provider nga duna’y gihimong unethical business partner.
Kini mao ang paglusad nila og mga promos nga bisan og dili ablihan sa mga kliyente, mukaltas gihapon og load. Alayon niini, misaad matud pa ang maong higanteng telcos nga muhimo og system depress aron matangtang na ang tanang value-added service.
Kini gawas pa sa gisugyot nilang hatagan og notifications sa mga telcos ang ilang mga subscribers sa tanang load og musulod og mugawas gikan sa ilang sim pack kansa positibo matud pang gidawat sa mga telcos.
Anaa pa ang pagpasaka og kaso sa Department of Trade and Industry kon DTI batuk sa mga service providers nga magpadala og mga makatintal nga promos nga bisan og dili i-avail sa ilang mga subscribers, mukuha gihapon og load.
Alayon niini, magpahigayon pa og ikaduhang hearing ang maong komite aron lang maseguro nga mahunong na ang nakaw load nga nakadugang sa kalisdanan sa mga tawo.
Gidugang sa senador nga gusto nang sayron sa ilang komite kung unsa nga aksyon ang gihimo sa mga telcos og sa ilang mga value added service providers. Giklaro pa niini nga dili makalikay sa ilang obligasyon ang mga telcos tungod kay mukita gihapon sila sa gihimo sa ilang mga accredited nga mga service providers. (Beth Ruiz)
