BUTUAN CITY – Wala damha sa nag-post og video diha sa facebook nga mag-viral ang iyang gi-post nga video mahitungod sa mga batang nagsakay sa usa ka bike nga gibutangan ug katig nga nahisama na sa habal-habal.
Sa pakighinabi ning sibyahan, gibutyag ni Jenn Mapute Cubillas, gi-videohan niya ang maong mga bata dihang nalabyan niya kini gikan sa Brgy. Sangay sakop sa maong lungsod.
Sigon niini, nalingaw ang 4 ka mga bata ug malipayon pa samtang nagsakay sa gi-improvise nga bike rason nga iya kining gi-videohan apan wala niya damha nga daghan diay ang giganahan sa niini dayong share aog post diha sa social media.
Hinuon giklaro niini nga kung talagsaon lang kini nga talan-awon alang sa mga netizens, natural na lamang kini nga talan-awon sa ilang lugar.
Naghinaot na lamang kini nga unta mahatagan ug pagtagad ang maong mga bata pinaagi sa paghatag ug educational assistance ngadto kanila aron maseguro usab ang ilang kaugmaon.
Sa karon, muabot na sa kapin 700 ang mga shares niini og dul-an sa 70, 000 ang mga views. (Rolan Janea)
