BUTUAN CITY – Kamatayon ang na-angkon sa tulo ka mga regional players sa Caraga Regional Athletic Meet kon CRAM 2018 human mibangga sa usa ka prime mover ang ilang gisakyang motorsiklo.
Sa pakighinabi ning sibyahan, gibutyag ni P/Sr. Insp. Adrene Camo, hepe sa Rosario Municipal Police Station, nga nahitabo ang aksidente bandang alas-4:25 ang takna sa hapon didto sa national highway sa Brgy. 6, lungsod sa Rosario, Agusan del Sur.
Naila ang mga namatay nga sila Sherwin Arellano, 17-anyos, residente sa Brgy. San Isidro, lungsod sa Trento; Michael Jun Rendon, 18-anyos, residente sa San Francisco, Agusan del Sur ug Edison Fernandez, 21-anyos, residente sa lungsod sa Rosario sa susamang lalawigan.
Matud pa nga bag-uhay lang naka-uli ang mga biktima nga mga high jump athletes ug nagkahagaray nga mag-inom.
Kusog matud pa ang ilang pagpadagan dihang pa-uli na ug pag-abot sa dapit nga nahitabuan, ilang nakasugat ang prime mover nga gimanehuan ni Sonny Villanueva, 34-anyos ug residente sa Panabo, Davao del Norte.
Tungod sa kakusog sa ilang pagpadagan, wala na nila nalikayi pa ang kasugat nga sakyanan hinungdan sa pagkapilit sa isa sa atubangang bahin sa trak samtang milagpot usab ang duha hinungdan sa ilang kamatayon.
