BUTUAN CITY – Mga bug-at nga silot ang mamahimong mapahamtang kang Marcia Pajo, 41-anyos, residente sa Purok-1, Barangay 16, Ong Yu og nagtudlo sa Maug Elementary School ning siyudad sa Butuan.
Kini higayong mahukman siyang guilty sa pagpayuhot og ginadiling druga.
Gipasabot ni Elizalde Bernales sa DepEd-Caraga nga kinahanglang muhimo og imbestigasyon niini ang DepEd- Butuan City aron duna sila’y basehan sa paghimo og lakang batuk sa nahimo ni Pajo.
Kung masutang sad-an ang maong matutudlo, mamahimo siyang pahamtangan og silot nga termination from service, pag-forfiet sa iyang madawat nga mga benepisyo ingon man ang pagdili na kaniya nga makaserbisyo sa government agencies.
Gidugang ni Bernales nga gawas pa kini sa kasong kriminal nga mamahimong ipasaka batuk sa suspek kung duna’y indibidwal nga mupasaka niini ngadto sa korte.
Mahinumdumang nakuhaan og lima ka sachets sa gidudahang shabu ang suspek uban sa marked money atol sa gihimong buy bust operation pasado alas-9:40 ning mi-aging gabii. (Beth Ruiz)
