BUTUAN CITY – Gikatakdang pasakahan ug kaso ang tulo ka mga trabahante sa usa ka bansuhan sa lungsod sa Las Nieves, Agusan del Norte human kini nga gi-operasyunan sa mga operatiba sa NBI – Central Office.
Nasayran nga atol sa gipahigayon nga pagpa-implementar sa Search Warrant # 1932-2018, nasikop ang tulo ka mga dinakpan nga sila Wenefredo Prenbuela Y Alcala, 28, taga- Purok 4 Brgy. Maningalao, Las Nieves, Agusan del Norte; Joel Sucubos Y Betinol, 38, ulitawo, taga- Purok 7 Brgy. Mat-i, Las Nieves; ug Reynaldo Monforte, 22, Brgy. Maningalao, Las Nieves, Agusan del Norte.
Giaresto sila sa mga operatiba sa Environmental Crime Division sa NBI – Central Office subay sa paglapas sa PD 705 amended by Executive Order 277.
Ubay-ubay matud pa nga mga illegal nga kahoy ang nakumpiska sa mga otoridad hinuon wala pa masayri kung unsa kadaghan ang mga nakumpiskang kahoy.
Wala pa usab mihatag ug pamahayag ang taga – NBI subay sa nasangpit nga operasyon. Gituohan nga gipanag-iyahan sa Mayor sa Dapa, Surigao del Norte nga si Mayor Peter Boy Ruaya ang nasangpit nga bansuhan.
Padayon pa usab nga gikutay ning sibyahan ang kabahinan sa mayor aron makuhaan ug habig mahitungod sa maong panghitabo.
Sa karon, gikustodiya na ang nasangpit nga mga suspek sa may Butuan City Police Station 1.
