BUTUAN CITY – Magpahigayon matud pa ug color tagging ang Butuan City Engineering Office ngadto sa mga nakabaldang poste nga maoy gitudlong hinungdan sa pagkalangay sa urban drainage system project ning syudad.
Sa pakighinabi ning sibyahan, gibutyag ni Butuan City Councilor Vincent Rizal Rosario, chairman sa Committee on Infrastructure, Public Works and Utilities sa Sangguniang Panlungsod, nga himuon ang nasangpit nga lakang aron masayran kung kinsa gyud ang tag-iya sa matag poste nga maoy nakalangan karon sa paghuman sa flood control project ning syudad.
Sigon niini, nga nagpahigayon na sila ug ubay-ubay nga meeting ning miaging semana kauban ang mga telecommunication ug cable companies ning syudad aron mahisgutan ang maong problema.
Gi-angkon niini nga nagkaproblema gyud karon ang implementing agency niini nga mao ang DPWH ingon man ang contractor tungod kay dili man pud nila diha-dihang matang-tang ang nasangpit nga mga poste tungod kay posibleng mapasakahan usab sila ug kaso.
Gawas niini, lakip usab nga nakaproblema nila ang tag-iya sa mga drive ways nga maagian sa ilang proyekto hilabi na sa may dalang Ochoa Ave.
Hinuon, lauman nga maplastar na ang tanan pagkahuman sa pagahimong tagging karon sa City Engineering Office tungod kay subling ipatawag ang mga nasangpit nga mga kompanya aron sila na’y mu-relocate sa ilang mga poste. (Mon Aplaya)
