BUTUAN CITY – Siento porsiento nang nahidangat dinhi sa dakbayan sa Butuan ang tanang mga delegado sa mga schools division offices sa Department of Education kon DepEd-Caraga alang sa pagbukas na ugmang adlawa sa 21st Caraga Regional Athletic Meet kon CRAM.
Gibutyag ni Michael Martin – tigpamaba sa DepEd-Butuan City Division, positibo siyang mamintina sa ilang dibisyon ang kampyunato nga kung matuman, mao na unya ang ilang ikawalo nga kampyunato.
Giklaro pa sa opisyal nga ila nang na-address ang mga problemang gipa-abot sa ilang buhatan apil na ang mga problemang nasinatian sa mga billeting quarters dinhi lang sa siyudad sa Butuan.
Plastado na matud pa ang tanang kinahanglanon alang sa maong padula pinaagi sa suporta sa lokal nga kagamhanan pagpanguna ni Mayor Ronnie Vicente Lagnada. Pormal nga buksan ugmang adlawa ang nasangpit nga kalihukan. (Beth Ruiz)
