BOMBO BUTUAN – Gitoohang tulis ang nahitabong pagpamusil kagahapon sa alas 3:00 sa hapon sa national highway sa Purok-3, Barangay Agong-ong lungsod sa Buenavista, Agusan Del Norte diin usa ang patay samtang samaran ang branch manager sa usa ka bangko.
Nasayrang miabot sa lugar ang tulo ka suspek sakay sa usa ka motor ug gipaabot ug halos 30 minutos ang ilang target nga L300 Van sa usa ka bangko sa lungsod sa Nasipit sa susamang lalawigan.
Timing pa nga halos mohunong ang sakyanan sa maong lugar tungod sa daot nga kalsada hinungdang napaulanan ug maayo sa mga suspek ang sakyanan gamit sa mubo nga klase sa armas.
Patay on-the-spot ang security guard nga si Jerson Lumanaw samtang na-igo sa walang dughan ug gidala sa ospital ang drayber nga si Noreyv Barsobia nga maoy branch manager usab sa bangko.
Dala matud pa sa mga suspek sa ilang pagsibat ang usa ka bag nga matud pa dunay sulod nga kwarta. Sa pakighinabi ning sibyahan kang P/ Sr. Insp. Calvin Placer, hepe sa Buenavista Municipal Police Station, padayon pa nilang gipanubayan ang maong panghitabo.
Lakip sa padayon nilang gikumpirma kung pila ang kwarta nga sulod sa bag nga nakaplagan sa likod sa ingkuranan sa guwardiya ug unsa nga bag ang nadala sa pagsibat sa mga suspetsado.
