Search and retrieval operations, nagpadayon sa 5 missing sa Surigao Del Norte tungod sa Bagyong Basyang; patay, nadugangan ug 4
BOMBO BUTUAN – Nagpadayon ang search and retrieval operations sa lungsod sa Alegria, Surigao del Norte alang sa lima ka mga tawong nagpabiling missing human ang pagkuso-kuso sa bagyong Basyang dinhi sa Caraga Region.
Sa eksklusibong pakighinabi sa Bombo Radyo Butuan, gipadayag ni Alegria Vice Mayor Dominador Esma nga gideklara na nila ang state of calamity kagahapon tungod sa kadako sa damyos nga gibilin sa maong bagyo sa ilang lungsod nga resulta usab sa hatud niining flashfloods.
Mu-abot matud pa sa 80-porsiento sa Brgy. Alipao ang nalubong sa baha kondiin ang siltation, milapas na sa highway.
Kini human nga walo ka mga lugar ang na-igo sa landslides og wala pa’y labot sa mga nabahaan ilabina sa Brgy. Alipao, San Pedro og San Juan.
Una nang gi-ila ang duha sa mga namatay nga sila Gerson Damalerio og Reynaldo Cadayao samtang padayon pang gi-ila ang laing duha nga napalgan sa kalubian duol sa tulay sa Brgy. Magtiaco og Brgy. Oano.
Tungod matud pa sa flashfloods, naguba ang ilang reservoir apil na ang mga linya sa tubig hinungdan nga wala sila karo’y supply sa tubig.
Mi-abot usab sa 54 ka mga balay ang nabanlas hinungdan sa hingpit niining pagkadamyos samtang 514 ang partially damaged human nalanapan og siltation.
Nakankan usab ang tulay sa Magtiaco kansa mao na ang ikaduhang higayong nahitabo sa maong tulay rason nga gisugyot niya sa Department of Public Works and Highways kon DPWH nga usbon ang maong istraktura.
