BUTUAN CIT Y – Tungod sa hulga nga dala ni bagyong “Basyang”, nagpagawas na og advisory si Surigao del Norte Governor Sol Matugas sa pagsuspende sa klase karong adlawa, Lunes Pebrero 12 gikan sa preschool hangtud sa elementary level sa tanang pampubliko og pribadong tunghaan.
Kini ang kinumpirma sa Surigao del Norte Provincial Disaster Risk Reduction and Management Office kon PDRRMO.
Samtang gibutyag ni Caroline Catalan sa Department of Social Welfare and Development kon DSWD-Caraga, naka-preposition na sa ilang mga field offices ang kinatibuk-ang 11,166 ka mga family food packs nga nagkantidad og P3, 78,958.80.
Gawas pa kini sa available usab nga mga non-food items sama sa habol, dignity kits, laminated sacks, malong, mosquito nets, og uban pa nga nagkantidad usab og P3,807,172.24.
Samtang sa Office of the Civil Defense kon OCD-Caraga, gibutyag ni operations chief Amado Posas, nga nahisgutan na nila sa meeting ka-uban ang mga concerned response units ang pag-preposition sa ilang mga response assets alang sa ipahigayong pre-emptive evacuation.
Panawagan niini nga himuong prayoridad ang kaluwasan, seguridad og ang pagpakaylap pa sa ilang information dissemination aron masakmit ang zero casualty.
Gidid-an na usab sa Philippine Coast Guard ang mga mangingisda og mga gagmay’ng sakyanang pandagat sa pagpalawod sa eastern seaboard sa Visayas og Mindanao tungod sa daut nga panahon. (Beth Ruiz)
