BUTUAN CITY – Tungod kay dili gusto sa lokal nga kagamhanan sa Surigao City nga mahinumdumang ang trauma nga hatod sa magnitude 6.7 nga linog nga mi-igo sa ilang siyudad, insaktong usa ka tuig unyang alas-dies sa gabii, gipadayag ni Vice Mayor Alfonso Casurra nga wala sila’y kalihukan karong adlawa alang niini.
Sa eksklusibong interview sa Bombo Radyo Butuan, gipadayag sa opisyal nga duna’y mga pribadong grupo nga magpamisa isip pasalamat sa pagkaluwas nila human ang linog og duna usa’y muhimo og programa unyang gabii.
Dugang pa sa opisyal, 90-porsiento nang na-repair ang mga dalan nga naguba sa linog gawas lang sa tulay sa Brgy. Anao-awon nga wala pa nasugdan ang repair works apan duna na’y gihimong diversion road samtang duna pa usa’y mga tunghaang wala pa sugdi pag-rehabilitate hangtud karon sama sa Surigao State College (SSC).
Aminado si Vice Mayor Casurra nga nabati pa gihapon sa ilang mga constituents hangtud karon, ilabina kadtong wala’y nadawat nga intervention sama kaniya, ang grabeng trauma tungod sa dili maayo nilang nasinatian.
Kini usab ang hinungdan nga wala gisanong sa mga lokal naga opisyal ang hangyo sa uban nga magpapasar og ordinansang magrekognisa sa Pebrero 10 isip adlaw nga magpahinumdom kanila sa maong hitabo.
Mahinumdumang walo ka mga tawo ang natalang patay sa maong linog og milyunes pesos ang hatod niining damyos sa mga imprastraktura og sa kabalayan. (Beth Ruiz)
