BUTUAN CITY – Nakatala na ang Department of Health kon DOH-Caraga og tulo ka mga indibidwal nga na-ospital pipila ka buwan human natupukan og Dengvaxia.
Ang maong ihap, gikan usab sa 277 ka mga indibidwal nga natupukan og anti-dengue vaccine human gilusad sa Department of Health kon DOH ang kontrobersyal nga bakuna niadtong tuig 2016.
Sigon ni Romelyn Torralba – information officer sa DOH-Caraga, na-admit ang maong mga indibdiwal tungod sa mga dengue related symptoms sama sa hilanat, pagpanakit sa tiyan, rashes sa panit.
Apan samtang padayong gi-atiman sa ospital, duna usa’y usa sa mga pasyente nga nakasinati og respiratory problems dungan sa pagklaro nga pareho nang discharged ang tulo.
Na-monitor ang maong ihap sa mga natupukan og Dengvaxia ning rehiyon tungod sa mas gipahugtan pa nilang adbokasiya nga ang tanang natupukan niini, kinahanglang i-report sa ilang buhatan aron ma-apil sa monitoring.
Nasayrang mi-abot sa maong ihap ang natupukan sa kontrobersyal nga bakuna bisan og wala’y labot ang rehiyon sa Caraga sa mga pilot areas nga gilangkuban sa National Capital Region kon NCR, CALABARZON kon Calamba, Laguna, Batangas, Rizal og Quezon og Central Luzon.
Nakuha matud pa nila ang maong data gikan sa Philippine Pediatricians Society human nakig-alayon kanila ang mga private pediatricians og ang ginikanan sa nabakunahang mga bata.
Sa maong ihap matud pa, ang nga natupukan nga anaa sa age bracket nga zero ngadto sa 10-anyos, mi-abot sa 50 samtang ang 11 ngadto sa 20-anyos, mi-abot sa 191 ka mga indibidwal samtang ang nag-edad og 21 ngadto sa 30-anyos anaa sa pito lang ka ihap, ang mga nag-edad og 31 ngadto sa 40-anyos anaa sa lima samtang siyam sa mga nag-edad og 41 ngadto sa 50-anyos.
Pinakadaghan usab sa mga nagpabakuna naggikan sa lalawigan sa Agusan del Norte nga mi-abot sa 132, Agusan del Sur – 40, Surigao del Norte 36, Surigao del Sur -56, Dinagat Island nga mi-abot sa siyam samtang tulo sa 277 ang gikan sa Luzon og mibalhin na pagpuyo sa Caraga Region. (Beth Ruiz)
