BUTUAN CITY – Anaa sa delikadong kahimtang ang driver og laing sakay sa usa ka Nissan Navara pick-up human head-on nga nagbangga sa usa ka yunit sa Bachelor bus pasado alas-5:30 kagahapon sa hapon sa national highway sa Purok 2, Brgy. Salvacion, Prosperidad, Agusan del Sur.
Gi-ila ni PO1 Ma. May Santana ang mga biktimang sila Kevin Randell Sy, hingkod ang edad, manager sa usa ka kompanya sa Davao City og ang pasahero niining Brendo Villanueva nga taga-Davao del Norte kinsa parehong gidala sa usa ka ospital sa Davao City samtang ang driver usab sa bus nga duna’y body number 4255 mao si Jonathan Maitim.
Sa pakighinabi ning sibyahan gibutyag sa maong pulis nga gikan sa Butuan City ang bus og padulong unta sa Davao City dihang nakasugat niini ang pick-up sa kurbadang bahin sa maong lugar hinungdan sa head-on-collission.
Duna’y pito ka mga pasahero usab sa bus ang angol apan natambalan na kini sa may DO Plaza Memorial Hospital aog pareho silang out-patient.
Gi-impound na sa ilang buhatan ang bus samtang subject for towing usab ang pick-up tungod sa grabeng pagkadamyos niini. (Beth Ruiz)
