BUTUAN CITY – Gibana-banang mukabat sa 300-mil pesos ang inisyal nga damyos human nalamoy ang pipila ka parte sa dakbalay nga gi-ukupahan sa First Standard Credit Corporation sa may JC Aquino Avenue kaganinang sayo sa buntag.
Gibutyag ni Fire Chief Insp. Peter Montaus sa Bureau of Fire Protection kon BFP-Butuan, gituyo panglungkab ang maong dakbalay base na usab sa mga narekober nilang mga gamit sa sulod og gawas nga bahin niini og pipila ka mga sirkumstansya.
Apil niini ang narekober nga duha ka mga martilyo og ladder nga anaa sa likod og gawas nga bahin sa maong dakbalay, gibangagan nga vault nga igo lang masulod ang kamot ingon man ang giguba nga usa ka linya sa atop og alkuba diin gitu-uhang misulod ang wala pa mailang mga resposable.
Gidugang ni Montaus, posible matud pang nasuko ang mga responsable tungod kay 80-pesos lang ang kwartang ilang nakuha gikan sa vault hinungdan nga nagdesisyon kining sunugon ang maong dakbalay.
Apil sa nadamyos ang pito ka mga motorsiklong giplastar sa sulod, mga lingkuranan og mga papeles.
Padayon gihapon ang ilang himuong imbestigasyon aron ma-ilhan ang mga responsable ilabina nga duna’y gi-install nga CCTV sa sulod nga bahin og gawas sa maong establisamiento. (Beth Ruiz)
