BUTUAN CITY – Gihikay na ang mga kasong ipasaka batuk sa duha ka Barangay Kapitan og kanhe kapitan sa siyudad sa Cabadbaran, Agusan Del Norte nga nasikop atol sa pag-pangronda sa kapulisan kaganinang sayu sa buntag ug nakuhaan sa mga armas, granada, mga bala ug dynamita.
Giila ni P/Chief Insp. Renel Serrano, Hepe sa Cabadbaran City Police Station ang mga suspetsado nga sila Kapitan Alberto Baldo, sa Brgy. Bay-Ang ug Kapitan Judith Cueno, sa Brgy. Del Pilar lakip na ang iyang bana nga kanhe kapitan usab nga si Rico Cueno.
Nakumpiska gikan sa posisyon sa mga suspek ang granada, 2 ka uinit sa .45 nga kalibre sa mga pistola uban sa mga buhing bala, usa ka .38 nga pistola, usa ka granada, ug dynamita.
Gikumpirma usab ni Serrano nga walay napakita ang mga suspek og dokumento sa nasangpit nga mga armas.
Nasayrang gihimu ang pagronda sa panimalay ni Kapitan Baldo alas 4:00 sa buntag samtang alas 5:00 sa buntag usab sa balay ni Kapitan Cueno.
Wala matud pa nagpakita ug pagsukol ang mga dinakpan tungod na usab sa kadaghan sa mga pulis nga gikan sa Cabadbaran City Police Station ug Agusan Del Norte Provincial Public Safety Company.
Ang pagpangronda gihimo subay sa Search Warrant sa Illegal Possession of Firearms nga giisyu sa sala ni Judge Emmanuel Escatron, sa Branch 2, Regional Trial Court, 10th Judicial Region Hall of Justice Butuan City.
Sa karun, gikustudiya na sa Cabadbaran City Police Station ang mga suspetsado.
