1 patay, 8 angol sa vehicular accident sa Lianga, Surigao del Sur

BUTUAN CITY – Gipasakaan na og kasong reckless imprudence resulting to homicide and multiple physical injuries ang driver sa van nga nakabangga sa usa ka pedestrian og mibangga usab sa maong sakyanan ngadto sa usa ka punuan hinungdan sa pagka-angol sa iyang pito ka mga pasahero.
Sigon ni PO2 Anjun Bandoy sa eksklusibong pakighinabi sa Bombo Radyo Butuan, pasado alas-3:35 ning mi-aging hapon natigayon ang maong insidente sa Purok-5, Bgry. Baucawe, lungsod sa Lianga, Surigao del Sur.
Migawas sa ilang inisyal nga imbestigasyon nga ang van nga gikan pa sa Tandag City og padulong unta ngadto sa San Francisco, Agusan del Sur kusog nga mipadagan. Pag-abot sa dapit nga nahitabuan, nakatulog ang driver niining si Teofilo Gelacio Jr., 55-anyos og residente sa Purok 3, Brgy. 4, lungsod sa San Francisco, Agusan del Sur.
Wala matud pa makontrola sa driver ang steering wheel dihang na-side swipe niini ang mitabok sa dalan nga si Eduardo Cagas, 61 anyos, minyo og residente sa Purok 5, Brgy. Baucawe, lungod sa Lianga, hinungdan nga sa pagbalik niini didto na kini mibanggan sa punuan sa lubi.
Maayong pagkadamyos sa windshield og sa lawas sa sakyanan resulta sa pagkamatay sa usa niya ka pasaherong si Fritz Marte, minyo og residente sa Brgy. Baan ning siyudad.
Daling gidala usab sa Lianga District Hospital ang laing mga pasaherong pulos taga-Surigao del Sur nga sila SPO2 Evelyn Guzman, 42 anyos, minyo nga taga-Tandag City, Jevelyn Ruaza, 39-anyos nga taga-Cantilan, Irene Liana, 27-anyos nga taga-San Agustin, Federica Sayawan, 52 anyos nga taga-Hinatuan, Alexis Trimidad, 43 anyos nga taga-Barobo, Sempronio Galila, 25 anyos nga taga-Cortez,og Remyleo Tecon, 49 anyos nga taga-Tandag City. (Beth Ruiz)