BUTUAN CITY – Prayuridad sa bag-ong milingkod nga kapitan sa Brgy. San Vicente ning siyudad sa Butuan nga si Rauzil Raprap Carampatana ang pagtutok sa sports development ingon man ang pagmintina sa kahapsay og kalinaw sa ilang barangay.
Giklaro kini sa bag-ong kapitan human mihulip sa mi-resign niyang amahang si Raul Carampatana sa eksklusibong pakighinabi ning sibyahan.
Gibutyag ni Kapitan Rauzil nga iyang namatikdan nga kung maayo ang pagkadala sa peace and order situation sa usa ka barangay, maayo usab ang kalambuan og kaayuhan sa barangay.
Bisan pa man sa iyang kabatan-on pa, apan paningkamutan niyang iyang mahatag ang tanan niyang makaya aron lang maserbisyuhan ang ilang mga residente.
Paningkamutan usab niyang matupngan kung dili man gani, malabwan ang mga nahimo sa iyang amahan diha sa ilang barangay.
Usa usab sa iyang paningkamutan nga mamintina nila ang ilang pagka-Hall of Famer sa natad sa Pulong Tagapamayapa.
Alayon niini, iyang gipasalig sa mga tagi-barangay nga iyang tibawason ang mga nahimo sa iyang amahan kinsa andam matud pang musuporta kaniya og sa entiro barangay council. (Beth Ruiz)
