BUTUAN CITY – Supak si kanhi congressman og kasamtangang Bayan Muna chairperson Neri Colmenares nga aprubahan sa mga kongresista sa ilang pag-convene isip Constitutional Assembly kon ConAss ang mga probisyon sa ilang gisugyot nga konstitusyon ilabina kadtong ‘self-serving’ kon mupabor kanila.
Sa eksklusibong pakighinabi sa Bombo Radyo Butuan, gipadayag ni Colmenares nga bisan og musuporta siya sa federalism, apan dili siya musugot nga aprubahan sa mga kongresista ang dili pagpabayad nila og buhis uban sa mga senador taliwa nga mga tag-as silang opisyal sa kagamhanan.
Anaa pa ang paglugway sa ilang pagpangatungdanan higayong dili mahinayon ang eleksyon sunod tuig apil na ang sugyot nga himuong lima ka tuig ang tulo ka tuig nga termino sa mga kongresista.
Gidugang ni Colmenares nga angayang ipasabot sa mga magbabalaud ngadto sa katawhan ang mga probisyong nasulod sa ilang gisugyot nga konstitusyon aron dili makuratan ang mga Filipino higayong ma-aprubahan na ang pederalismo.
Apil na niini ang planong pagtangtang sa Office of the Vice President, Commission Elections kon COMELEC, Commission on Audit, Civil Service Commission, apil na ang pag-dissolve sa Kongreso og paghatag og legislative power si Pangulong Rodrigo Duterte. (Beth Ruiz)
