BUTUAN CITY – Duha ka anggulo ang gilantaw sa practicing joirnalist nga si Franklin Caliguid sa pagpasira sa kagamhanan sa online news website nga Rappler kagahapon.
Sa eksklusibong pakighinabi ning sibyahan, gibutyag sa kolumnista nga ang gihimong rason sa pagpasira sa kagamhanan sa Rappler mao ang paglapas matud pa niini sa Corporation Code og Anti-Dummy Law base na usab sa balaud nga naglimita sa foreign ownership sa media entity sa nasud.
Apan sa iyang lantaw sa press freedom, makonsidera niyang pagpamig-ot ang gihimo sa kagamhanan ilabina nga kritikal ang Rappler ngadto sa Duterte administration.
Sa iyang panglantaw, posibleng nangita lang og paagi ang kagamhanan aron maminusan ang pagsaway niini sa administrasyon.
Kini nga mga punto, angayan matud pang lantawon usab og maayo sa katawhan.
Dili usab siya mutuo nga nangunay sa pagpasira niini si Pangulong Rodrigo Duterte tungod kay ang Securities and Exchange Commission kon SEC nga nagpasira niini, duna’y kaugalingong chairman kansa usa ka dependent body.
Nasabtan matud pa niya ang baruganan sa Rappler nga politically motivated matud pa ang maong lakang apan sila na ang angayang magpamatuod niini. (Beth Ruiz)
