BUTUAN CITY – Business as usual gihapon ang lokal nga kagamhanan sa Buenavista, lalawigan sa Agusan Del Norte human milingkod si acting Mayor Ronilyn Borja kagahapon sa buntag hulip sa suspendidong si Mayor Norbert Pagaspas Sr.
Sumala sa opisyal sa eksklusibong pakighinabi sa Bombo Radyo Butuan, nadawat niya ang kamanduan kagahapon gikan sa opisina sa Department of Interior and Local Government kon DILG-Caraga ug epektibo kini sa alas-11:28 kagahapon sa buntag hangtud na sa Pebrero 10 ning tuiga.
Sa iyang paglingkod isip acting mayor, gipaneguro niini ang saktong pagpanerbisyu ilabina sa pag-isyu ug business permits o kaha pag-renew niini.
Duna lang matud pay himoon ang opisyal nga notifications ug pagpahigayon sa meeting karong Lunes aron mahibal-an nga sitwasyun sa lungsod.
Alayon niini, gipahibalo ni acting Mayor Borja ang tanang taga-Buenavista nga kung dunay concern, dili magduha-duha sa pagdool sa munisipyo.
Mahianumdumang gisuspende sa Ombudsman si Mayor Pagaspas human nakit-an og bug-at nga ebidensya sa kasong simple neglect of duty nga gipasaka sa mga complainants nga sila Imelda Ignalig, Joselito Pesco, Celso Echevarre, Ronilo Fedelis, Daisy Medina og Emmanuel Sobrecaray – parehong mga empleyado sa lokal nga kagamhanan sa maong lungsod. (Rolan Janea)
