BUTUAN CITY – Gikumpirma ni Atty. Allen Gasulas, regional legal officer sa Department of Interior and Local Government kon DILG-Caraga nga hingpit nang na-suspende si Buenavista, Agusan Del Norte Mayor Norbert Pagaspas sa iyang puwesto.
Kini human na-serve na ang kamanduan gikan sa Ombudsman sukad kagahapon ngadto sa mayor nga mulungtad sa usa ka bulan.
Sumala pa ni Atty. Gasulas nga molingkod isip acting mayor si Vice Mayor Ronilyn Borja.
Apan giklaro sa abogado nga wala pa napahibalo ang Bise mayor tungod kay wala pay makapirma sa mga dokumento nga ihatag ngadto sa opisyal sa rasong naka-travel ang mga regional directors.
Gipasalig nalang sa abogado nga pinakadugay na ang Lunes sa pagpirma sa mga dokumento isip notice aron hingpit nga makalingkod si Vice Mayor Borja, isip acting Mayor sa Buenavista.
Kung mahinumduman, nakakita og saktong ebidensya ang Ombudsman sa kasong simple neglect of duty kansa usa lang sa mga kasong gipasaka sa mga complainants nga sila Imleda Ignalig, Joselito Pesco, Celso Echevarre, Ronilo Fedelis, Daisy Medina og Emmanuel Sobrecaray – pulos empleyado sa lokal nga kagamhanan sa maong lungsod.
