BUTUAN CITY – Padayong giila sa kapulisan ang 3 ka suspetsadong mitulis sa usa ka delivery van ug mipatay sa ahente niini kagahapon sa probinsiya sa Esperanza, Agusan Del Sur.
Sigon ni SPO3 Daniel Gerodico sa Esperanza Municipal Police Station, gikan nag-deliver ug ilimnon ang closed van didto sa Veruela, Agusan Del Sur apan nihunong ang sakyanan sa may Crossing Sampaguita sa maong lungsod mga alas 3:30 sa hapon aron mangihi ang ahente nga si Ralf Elisan, 33-anyos, olitawo nga taga Barangay Golden Riboon, Butuan City.
Dunay kalit nga miabot nga motor ug gipasakay siya balik sa van ug didto nagdeklara ug tulis. Gipang-gapos ug giba-atan ang ba-ba sa ahente lakip na sa pahinante nga si Apolonio Pangandian Amero, 23-anyos, olitawo nga taga P- 3, Barangay Malikato, Las Nieves sa Agusan Del Norte samtang gimanduan ang drayber nga si Joven Estrada, 34-anyos, menyu nga taga p-8, Ampayon ning siyudad nga ipadayun lang ang pagmaneho.
Hangtud nga miabot sila sa P-5 Duangan, Esperanza, alas 7:00 sa gabii.
Gipadagan ang drayber adiser nadunggan ang mga buto sa armas og paglabay sa pipila ka minuto, gibalikan sa drayber ang van ug sa dihang nasuta nga buhi pa ang iyang pahinante, iya kining gibadbaran sa gapos ug ba-at sa baba, adiser sila nanagan.
Apan ang ahente nga si Elisan, nakahi-agum ug tulo ka samad pinusilan sa ulo nga maoy hinungdan sa kamatayon niini.
Gikumpirma usab ni SPO3 Gerodico nga nawala ang kita nga sien mil ka pesos nga gikuptan sa ahente.
Sa karun, gikustudiya una sa Esperanza Municipal Police Station ang drayber ug pahinante samtang ang patay’ng lawas sa ahente anaa sa pribadong punerarya sa lungsod sa Esperanza, Agusan Del Norte.
