BUTUAN CITY – Gihulagway sa ika-12 nga finalist sa Bombo Music Festival nga si Joel Vacalares nga taga-Igpit, Opol, Misamis Oriental og composer/performer sa kantang ‘Hoy Juan’ nga nabati niyang mura siya og artista.
Kini human personal nga nakita kagahapon ang venue alang sa ilang himuong grand performance night ugma sa gabii.
Kini tungod sa kadako matud pa sa Rose Memorial Hall sa Central Philippine University (CPU) sa Jaro, Iloilo City.
Sa eksklusibong interview sa Bombo Radyo Butuan, gipadayag sa magtutudlong si Vacalares nga dili na bag-o alang kaniya ang pag-perform atubangan sa daghang tawo apan ang iyang himuon ugma, mao matud pa ang mamahimo niyang ‘biggest’ performance sa tibuok niyang kinabuhi.
Bisan og kabado, excited gihapon siya sa mahitabo ugma og misaad nga paningkamutan niyang dili siya makulbaan og dili magpadala sa bati-ong pressure.
Samtang giklaro ni Vacalares nga ang iyang kantang Hoy Juan, na-inspire kini sa nakita niya sa palibot ilabina sa mga dautang tawo nga wala pa nagbag-o sa ilang kinabuhi.
Nanghinaut siya nga pinaagi sa pagpaminaw sa iyang kanta, madasig ang mga Pinoy nga padayong nagpakabuhi sa dautang paagi nga mabag-o na. Dungan niini, naghatag siya og sample sa mga linya sa maong kanta. (Beth Ruiz)
