(picture courtesy of Roxanne Donaire-Velarde)
BUTUAN CITY – Patay nang nahidangat sa Agusan del Norte Provincial Hospital ang usa ka 6-anyos nga batang lalaki human kini wala mabantayi nga na-anod na palayo sa baybayon sa Brgy. Masao ning siyudad atol sa ilang pagpangaligo kaganinang buntag.
Sigon ni Masao Brgy. Kagawad Felix Lariba, duna pa’y pulso dihang narekober sa mananagat nga taga-Brgy. Lumbocan, ang biktimang si Samuel Delicano nga taga-Virgo St., Montilla Boulevard sa Brgy. JP Rizal ning siyudad.
Nagtuo matud pa ang mananagat nga t-shirt lang ang iyang nakita apan dihang iya kining gikuha, mao na diay kini ang nagkulob nang biktima kinsa dali pang gi-revive sa mga tawo adiser gidala sa ospital.
Gani, duna na’y migawas nga mga buwa sa tubig og sip-on gikan sa biktima dihang kini gi-revive apan wala gihapon kini naluwas sa hingpit.
Nabangalan matud pa ang biktima mga usa ka gatos metros na ang gilay-on gikan sa baybayan kinsa posibleng wala mabantayi tungod sa kadaghan sa mga nangaligo. (Beth Ruiz)
