BUTUAN CITY – Mi-abot na sa 449 ka mga pasahero ang stranded karon sa mga pantalan sa Brgy. Lipata og sa Philippine Ports Authority kon PPA, sakop sa Surigao City human nadugangan ang ihap sa mga barkong ilang gidid-an paglawig gikan sa mang mga pantalan padulong na sa mga destinasyon nga apektado sa bagyong Urduja.
Gibutyag ni Senior Chief Rommel Nomar sa Philippine Coast Guard kon PCG-Surigao City, sa Lipata port lang, mi-abot sa 302 ka mga pasahero ang stranded samtang 147 usab sa may PPA port.
Gidalikyatan na usab sila sa mga opisyal sa lokal nga kagamhanan sa Surigao City aron ma-assess ang ilang sitwasyon.
Samtang 67 ka mga pasahero usab ang stranded sa pantalan sa Nasipit, Agusan del Norte human gikansela sa Philippine Coast Guard ang ilang paglawig sukad pa ning mi-aging adlaw tungod sa tropical storm Urduja.
Sigon ni Richard Diparine, station sub-commander sa Nasipit Port, tungod sa pagpa-ilalom sa pipila ka mga lugar sa Visayas sa storm signal number 1 og number 2, nagdesisyon na lang silang dili pabiyahi-on ang maong mga barko.
Nahatagan na matud pa sila og pagkaon alang sa ilang pagkaon pinaagi sa lokal nga kagamhanan. (Beth Ruiz)
