BUTUAN CITY – Suspendido ang klase sa pribado ug pampublikong tunghaan sa Surigao City karung adlawa tungod sa epekto ni Tropical storm Urduja.
Kini base sa gipagawas sa lokal nga kagamhanan sa siyudad nga executive order number 53 tungod ang kusog nga pagbundak sa ulan ug huyop sa hangin.
Kagahapon sa alas 4:00 sa hapon, gi-isa na ang orange alert level 2 sa dakbayan, base na usab sa rekomendasyon sa Pag-asa-Surigao City hinungdan nga suspendido na ang klase gikan sa pre-school ngadto sa sekondaryang lebel.
Samtang pabiling kanselado usab ang biyahe sa mga sakyanang pandagat sa may Surigao Area tungod gihapon sa daot nga panahaon.
Sigon ni Romel Nomar sa Philippine Coastguard kon PCG-Surigao City, kagahapon sa buntag pa gikansela ang biyahe sa tanang sakyanang pandagat gikan sa Lipata port nagdto sa Liloan, Southern Leyte nga gisundan sa kanselasyon sa mga biyahe sa kadagatan sa Dinagat Island ug Siargao pagka-hapon.
Giklaro pa ni Nomar nga magpabilin ang ilang abisong pagkansela sa mga biyahe ugaling magpadayon ang kusog nga ulan og hangin, depende na unya sa himoon nilang assessment sa lakat sa panahon sa musunod nga mga oras. (Rolan Janea)
