BUTUAN CITY – Mi-abot na sa 66 ka mga pamilya kon 303 ka mga indibidwal ang opisyal nga natala sa City Social Welfare and Development kon CSWD nga apektado sa dakong sunog sa Brgy. Tandang Sora ning siyudad nga mi-abo sa 55 ka kabalayan.
Gibutyag ni Eldy David – tigpamaba sa lokal nga kagamhanan ning siyudad, sa maong ihap 33 ang mga nag-abang lang og kapuy-an sama sa mga estudyante.
Sa pakighinabi ning sibyahan, gibutyag sa opisyal nga sukad ang sunog, kaduha ka higayon nang nakatunol og hinabang ang city government ngadto sa mga biktima og gidu-aw na usab sila ni Mayor Ronnievic Lagnada aron personal nga masuta ang ilang sitwasyon.
Duna’y namakwit sa Villanueva Multi-Purpose Hall samtang ang uban temporaryong nagpuyo sa iyang mga kabanay og kahigalaan sa maong lugar.
Sa pagkakaron, ukupado na ang mga personahe sa CSWD sa profiling sa mga biktima sa sunog aron masuta kung kinsa kanila ang unahon pagpatukod og ilang kapuy-an.
