(pictures courtesy of Alex Cabardo)
BUTUAN CITY – Halos mu-abot sa lima ka sakong mga war materials ang narekober sa mga sundalong sakop sa 75th Infantry Battalion, Philippine Army human na-ilog ang regional headquarters sa Northeastern Mindanao Regional Command kon NEMRC sa rebeldeng New People’s Army kon NPA.
Sigon ni Captain Rodolfo Cordero Jr., Civil Military Operations kon CMO officer sa 401st Brigade, ang maong dakong kampo sa mga rebelde dinhi sa Caraga Region nga nahimutang sa bukirang bahin sa utlanan sa mga lungsod sa Lianga og San Agustin, Surigao del Sur, kayang maka-akomodar og hangtud 150 ka mga indibidwal.
Apil sa ilang narekober ang 37 ka mga improvised explosive devices kon IEDs nga gigamit isip landmines, nagkada-iyang klase sa mga bala, magazine sa AK-47, walo ka mga iCom radios, generator sets, NPA flag, mga subersibong dokumento og uban pa.
Gibutyag sa opisyal nga ang pagkadiskubre sa nasangpit nga kagamitan, resulta sa ilang nagpadayong pursuit operations human sa engkwentro ning mi-aging semana nga gikamatay sa duha ka mga rebeldeng NPA.
Gibiyaan matud pa sa mga rebelde ang mga armas dihang gisibatan ang pa-abanteng kasundaluhan. (Beth Ruiz)
