BUTUAN CITY – Igo na lang nagpatala sa buhatan sa kapulisan ang usa ka lola aron ma-record ang nangahanaw niyang alahas nga gitu-uhang gidala matud pa sa mipa-uli niyang katabang.
Sigon ni Evelyn Mosquite Kwi, 68-anyos, minyo og residente sa JC Aquino Avenue ning siyudad, dungan nga nahanaw sa pag-uli sa ilang katabang ang iyang bulawang ariyos, tulo ka bulawang singsing nga duna’y dyamante og tulo ka bulawang relo de pulso.
Bugtong gidudahan niyang mikuha niini mao ang iyang katabang nga si Sisi Balasan, 33-anyos, residente sa Magallanes, Agusan del Norte.
Kini tungod kay dihang gisusi nila ang lawak sa maong katabang, didto nila nakita ang duplicate sa yabe sa master’s bedroom nga gisulod sa bulsa sa jacket ni Balasan nga nabilin sa maong lawak.
Nasayrang ning mi-aging bulan pa nahanaw ang maong mga alahas apan kagahapon pa niya kini gitaho sa kapulisan tungod sa yawe nga nakit-an sa jacket sa suspek. (Beth Ruiz)
