BUTUAN CITY – Padayon ang gilusad nga security operations sa kasundaluhang sakop sa 401st Brigade, Philippine Army ngadto sa nanibat nga mga rebeldeng New People’s Army kon NPA.
Kini human ang ilang engkwentro ning mi-aging mga adlaw kabukiran sa Brgy. Diatagon, lungsod sa Lianga og Brgy. Buhisan sa lungsod sa San Agustin, Surigao del Sur nga gikamatay sa duha ka mga rebelde.
Sigon ni Captain Rodolfo Cordero Jr., Civil Military Operations kon CMO officer sa maong brigada, mukabat sa 37 ka mga improvised explosive devices kon IEDs ang narekober sa kasundaluhan sa nagpadayon nilang operasyon.
Sa eksklusibong pakighinabi ning sibyahan, gibutyag sa opisyal nga posibleng gamiton ang maong mga bomba sa himuong pagpangatake sa mga rebelde subay sa nagkaduol nga anibersaryo sa Communist Party of the Philippines kon CPP karong Disyembre 26.
Kumbinsido ang opisyal nga tungod kay alanganin na ang mga rebelde, gamiton na nila ang ilang mga front organizations sa ingon mapugos ang militar paghunong sa ilang gilusad nga security operations. (Beth Ruiz)
