BUTUAN CITY – Mitulo ang luha sa kalipay sa No. 7 sa mipasar sa Licensure Examination for Teachers kon LET 2017 secondary level, human nasayran ang iyang nakab-ot nga kalampusan.
Sumala pa ni Andie Angelika Beltran, graduate sa Bachelor of Science, major in Math sa Father Saturnino Urious University kon FSUU ning siyudad nga wala dayun siya mitoo sa nagpahibalo kaniya sa maong resulta hangtud nga siya na mismo ang nakakita sa posting.
Pagbutyag pa niini, naka-ambak pa siya sa kalipay ilabina kay gikonsidera na niyang bonus ang pag-abot niya sa No. 7 nga pwesto hinungdan sa tuma niyang pagpasalamat sa Kahitas-an.
Gisaysay pa niini ang iyang nabating kulba atol sa eksaminasyon ilabina kay dili siya segurado sa resulta niini.
Mitambag nalang kini sa tanang musunod nga mo-take ug exam nga ipadayon lang ang pagpaningkamot nga inubanan sa pag-ampo tungod kay walay imposible sa Ginoo. (Rolan Janea)
