Suspensyon sa police og military operations, hangyo sa 3rd party negotiators alang sa gidagit nga 2 ka pulis

BUTUAN CITY – Hangyuon sa gimugnang 3rd party negotiator nga maoy nakig-negosasyon sa mga abductors sa duha ka mga pulis sa Placer, Surigao del Norte, ang kapulisan og militar nga ihunong una ang ilang mas gipahugtang operasyon.
Kini aron maka-establisa na sila og contact sa mga rebeldeng New People’s Army kon NPA nga maoy midagit nila PO2 John Paul Doverte og PO2 Alfredo Degamon Jr.
Sigon ni Supreme Bishop Maximo Ree Timbang, tigpamaba sa mga negosyador, padayon ang ilang paningkamot nga ma-contact ang mga abductors aron masabutan gilayon ang luwas nga pagbuhi sa maong mga pulis.
Gusto nilang sanungon una sa militar og kapulisan ang ilang hangyo nga mao usa’y hangyo sa pamilya sa gidagit nga mga pulis aron ila nang masayran ang mga demands sa mga abductors.
Nasayrang kini na ang ikalimang pagpangdagit nga gilhimo sa mga rebelde sa maong lalawigan kondiin pulos positibo ang ilang mga gihimong negosasyon hinungdan nga kampante siyang mabuhian usab ang duha ka mga pulis.
Subay niini, mi-apela si Bishop Timbang sa mga opisyal sa Surigao del Norte Police Provincial Office og sa 30th Infantry Battalion, Philippine Army nga ihatag una ang ilang hangyo aron mu-abante na ang ilang gihan-ay’ng mga lakang. (Beth Ruiz)