BUTUAN CITY – Dili hununong sa kapulisan ning rehiyon ang pursuit operations batuk sa mga rebeldeng New People’s Army nga midagit sa duha ka mga pulis sa lungsod sa Placer, lalawigan sa Surigao del Norte.
Gibutyag ni P/Chief Insp. Rennel Serrano – information officer sa Police Regional Office kon PRO-13, nga magpadayon ang operasyon hangtud nga hingpit nang marekober ang ilang mga ka-ubanang sila PO2 John Paul Doverte og PO2 Alfredo Degamon Jr.
Samtang sa panig usab sa Local Crisis Management Committee, gipadayag ni Serrano nga gi-elevate na kini ngadto sa provincial level nga gipangunahan ni Surigao del Norte Gov. Sol Matugas kondiin sa pinaka-ulahing kalambuan, gihatagan na og cash assistance ang immediate family ang mga pulis.
Gidugang ni Insp. Serrano nga duna na’y gimugnang third party negotiator nga langkuban sa relihiyusong sektor kinsa maoy tahasan nga makignegosyar ngadto sa mga abductors.
Giklaro pa sa opisyal nga bukas ang kapulisan sa negosasyon tali sa mga abductors basta wala lamang sila’y ihatag nga mga kiondisyon. (Beth Ruiz)
