BUTUAN CITY – Gila-umang dugukon sa mga voluntary blood donors-to-be ning siyudad sa Butuan og kasikbit nga mga lalawigan, ang gi-atangang tinuig nga blood-letting activity sa Bombo Radyo Philippines, ang ‘DUGONG BOMBO 2017, A Little A Pain A Life to Gain.’
Tumong niini nga makatigom og igong supply sa dugo sa tibuok nasud ka-abag ang Philippine Red Cross aron duna’y magamit ang mga tawong nanginahanglan niini sa ingon masumpayan pa ang ilang kinabuhi.
Dinhi sa dakbayan sa Butuan, himuon ang maong kalihukan sa may Provincial Capitol Training Center sa Capitol Drive.
Suportado usab sa nagkada-iyang mga organisasyon og mga opisyal sa kagamhanan ang maong kalihukan.
Gani tungod sa kahalangdon sa maong blood-letting activity, maghatag og full scholarship ngadto sa mga mamahimong malampusong blood donors ang Grand View Colleges, isip pagpakita sa ilang hugot nga suporta sa maong kalihukan.
Ang maong grant, transferable ngadto sa mga tawong gustong hatagan niini sa mga blood donors.
Samtang gibutyag ni Police Regional Office kon PRO-13 regional director Chief Supt. Rolando Felix nga suportado sa kapulisan ning rehiyon ang maong kalihukan tungod kay pagtabang kini sa katawhan. (Beth Ruiz)
