BUTUAN CITY – Gi-activate na ang Crisis Incident Management Task Group sa Surigao Del Norte Police Provincial Office aron mag-imbestigar sa natigayong pagpangdagit sa rebeldeng New People’s Army kon NPA sa duha ka police officers kagahapon sa ala 1:40 sa hapon.
Giila ni P/ Chief Insp. Renel Serrano, Public Information Officer sa Police Regional Office kon PRO-13, ang mga biktima nga sila PO2 Alfredo Degamon Jr. ug PO2 John Paul Doberte, parehong sakop sa Placer Municipal Police Station.
Sumala pa ni Serrano, naka-duty ang duha ka biktima, nga dunay dalang 9mm nga pistola, sa police box sa national highway sa may Barangay Bad-as, lungsod sa Placer, Surigao Del Norte.
Saysay pa ni Serrano nga gipugos pagpasakay ang duha ka police sa van nga gi-abandona ra usab pag-abot sa Barangay Mabini sakop sa parehong lungsod.
Padayon karon ang hot pursuit operation sa kapulisan ug kasundaluhan dungan sa kamanduang pagpahugot sa mga checkpoints.
Gitawag pa sa opisyal nga desperadong lihok ang pagdagit, tungod kay walay hunong ang operasyon sa tropa sa gobyerno didto sa kabukiran.
Subay niini, nanawagan si Serrano sa katawhan nga motabang pinaagi sa paghatag ug impormasyon mahitungod sa mga mibatuk sa gobyerno. (Rolan Janea)
