BUTUAN CITY – Hangtud karon, wala pa’y saktong lead ang kapulisan sa gunman nga mipusil-patay kang Christopher Iban Lozada, anchorman sa Prime FM nga nakabase sa Bislig City, Surigao del Sur, ning mi-aging buwan.
Gikumpirma kini ni P/Sr. Insp. Arlene Tanzo, information officer sa gimugnang Special Investigation Task Group kon SITG, ang grupong nagtutok sa pagsulbad sa pagpusil-patay sa maong radio anchor.
Gibutyag ni Tanzo nga bugtong ang live-in partner lang ni Lozada nga si Honey Faith Toyco, ang makahulagway sa nawong sa suspek tungod kay siya lang ang nakakita kanila atol sa maong hitabo.
Apan sa pagkakaron, dili pa nila kini mapugos sa paghatag sa gikinahanglan nilang impormasyon tungod kay na-trauma pa karon si Honey Faith.
Gidugang sa opisyal nga hisgutan pa nila sa mga membro sa SITG ang mga paagi nga magsegurong maproteksyunan ang kinabuhi ni Toyco og mapa-ilalom kini sa witness protection program sa gobyerno. (Beth Ruiz)
