BUTUAN CITY – Gikonsiderang yawe aron mailhan ang mga primary suspects sa pagpatay sa komentaristang si Christopher Iban Lozada sa Surigao City ang nadakpan suspetsado sa kagahapon sa alas 2:00 sa hapon.
Sa pakighinabi ning sibyahan kang P/ Insp. Arlene Panso, tigpamaba sa gimugnang Special Task Force, giila niini ang suspek nga si Felixberto Villocino, sa Purok-2 Tabon, Bislig City, Surigao del Sur.
Nadakpan kini sa hiniusang puwersa sa Bislig City Police Station, Surigao del Sur Provincial Intelligence Branch, ug Criminal Investigation and Detection Group kon CIDG-Caraga kauban ang SAF troopers atol sa pag-implementar sa search warrant.
Nakuhaan ang suspek ug usa ka unit sa 357 nga pistola, granada ug mga buhing bala.
Sumala pa ni P/ Insp. Panso, dili primary suspek ang na-aresto apan dako kini ug tabang aron madakpan ang mga suspetsado human nila nakaylap ang impormasyong ang maong suspek, ang contact person o liason officer sa mga gun-for-hire group sa Bislig City.
Sa karun, gikustudiya na sa CIDG-Caraga ang nadakpang suspek alang sa tukmang disposasyon.
