BUTUAN CITY – Giklaro ni Lt. Kevin Gordolan sa 23rd Infantry ‘Masigasig’ Battalion, Philippine Army nga wala’y natigayong engkwentro tali sa tropa sa gobyerno og sa mga rebeldeng New People’s Army sa Brgy. Tungao ning siyudad niadtong Sabado.
Gitin-aw kini sa opisyal sa eksklusibong interview ning sibyahan, human nga pipila sa mga residente sa maong barangay ang nagpa-abot og impormasyon ning sibyahan nga migamit matud pa og helicopter ang kasundaluhan.
Gibutyag sa opisyal nga ang pagpasi-atab sa maong balita, desperadong lakang lang sa mga rebelde aron dauton ang maayong imahe sa kasundaluhan.
Kini ilabina nga posibleng kabahin lang kini sa ilang propaganda sa rasong wala na sila’y lugar nga kaadtuan ilabina nga nawad-an na sila og mga supporters sa masa.
Gidugang sa opisyal nga ang gikabisihan karon sa ilang batalyon mao ang paghatag og security assistance ngadto sa mga komunidad.
Pinaagi niini, mahatagan og malahutayong kalinaw ang mga komunidad ilabina kadtong na-ilad kaniadto sa mga rebelde nga misangpot sa kagubot. (Beth Ruiz)
