BUTUAN CITY – Gipasakahan sa Office of the Ombudsman og kasong graft si kanhe Butuan City Mayor Ferdinand Amante, Jr., mahitungod sa sunog sa usa ka establishimento niadtong 2012, diin 17 ka empleyado ang namatay.
Base sa imbestigasyon, nasayran nga gi-aprubahan sa lokal nga kagamhanan ang business permit sa Novo Jeans and Shirts Enterprises bisan paman sa kakulang niini sa Fire Safety and Inspection Certificate kon FSIC.
Una na matud pang gihatagan ug 30 ka adlaw nga lugway aron isumite ang mga tukmang dokumento, apan pakyas pa gihapon kining makapasar.
Sumala sa Ombudsman, nagpamatood lang kini nga dunay tulubagon si Amante, nga mipirma sa business permit bisan ug walay FSIC; ug ang duha pa niini ka opisyal nga si Licensing Officer IV Paul Cabrera nga nag-rekomenda sa pag-apruba sa maong permit; ug Acting City Fire Marshal Alric Gomez tungod sa pakyas niining gipahayag sa kanhe Mayor nga wala nag-comply ang nasangpit nga establishimento sa mga rikisitos.
Sa ilalom sa Section 5 sa Fire Code of the Philippines, tataw nga gibawal ang pag-isyu sa businessn permit kung walay FSIC.
Tungod kay nakalatid sa balaod nga dapat makig-alayon ang mga lokal nga kagamhanan sa Bureau of Fire Protection alang sa hugot nga pagtuman sa mga FSIC isip dokumentong kinahanglan adiser hatagan ug permit.
Alayon niini, nakatakda usab nga pasakahan ug Gross Neglect of Duty sila Amante ug Cabrera, ug uban pang nakakupot sa bisan unsang pampublikong opisina.
